Mërgimtari nga Zvicra, udhëtari i 2-miliontë në APN “Adem Jashari”

Aeroporti Ndërkombëtar i Prishtinës për herë të parë në historinë e tij ka arritur shifrën prej 2 milionë udhëtarësh brenda një viti. 

Për këtë rast, ky institucion ka shpërblyer udhëtarin e 2-miliontë, i cili ishte mërgimtari Naser Sadriu, që jeton në Zvicër. Naser Sadriu nga Podujeva është shpërblyer me një biletë kthyese dhe me shërbimet e aeroportit brenda një viti, shkruan albinfo.ch

Sadriu ka thënë se ishte në Kosovë për një rast vdekjeje, ndërsa ka falënderuar aeroportin për këtë dhuratë. Kryeshefi ekzekutiv i fluturimeve, Gokmen Aritai, e quajti si arritje shumë të rëndësishme këtë shifër për aeroportin. Ai ka thënë se kjo është festë historike për operimet e tyre. 

Aritai theksoi se projekti i Aeroportit të Prishtinës është nga më të suksesshmit në botë dhe rajon, sa i përket privatizimit. Ndërsa, ministri i Infrastrukturës, Pal Lekaj, u shpreh se në fundvit janë duke shënuar një sukses të aeroportit. Ministri Lekaj deklaroi se ky është mesazh për të gjitha kompanitë dhe investitorët që Kosova është mundësi e mirë për investime.