Mbi 800 fëmijë kanë dalë nga “Shota”

Nga SHSHV “Shota”, deri tash kanë dalë mbi 800 nxënës dhe nxënëse

Për 25 vjet me radhë, me moton “Të mësohemi të ecim shqip!”, Shkolla Shqiptare e Vallëzimit “Shota” me qendër në Aarau të Zvicrës, e themeluar nga artisti dhe koreografi ynë i njohur, Agron Bajrami, ishte dhe mbeti shkollë e vërtetë arti, në të cilën janë edukuar dhe edukohen fëmijët dhe të rinjtë tanë mërgimtarë të cilët kanë mësuar vallet burimore shqiptare dhe janë krijuar gjenerata valltarësh në Zvicër, duke kontribuar që të themelohen edhe shoqatat të tjera kulturore e artistike, të cilat veprojnë me sukses në shtetin helvetik.

Interpretimi i drejtë dhe në mënyrë artistike i folklorit dhe i kostumografisë sonë kombëtare, ka bërë që të rinjtë tanë të jenë të aftë të vazhdojnë drejt caqeve më të larta artistike në fushën e valleve dhe kostumografisë burimore e artistike.

Nga SHSHV “Shota”, deri tash kanë dalë mbi 800 nxënës dhe nxënëse, njofton “Shota”, përcjell albinfo.ch.

Ajo deri tash ka shfaqur mbi 1000 koncerte dhe ka marrë pjesë në festivale kombëtare e ndërkombëtare duke ngritur lartë imazhin e kulturës sonë shpirtërore përmes valleve dhe ka ngritur lartë kulturën materiale përmes kostumografisë origjinale nga të gjitha trevat shqiptare në Ballkan si dhe ka ndikuar fuqishëm që kulturat të veprojnë shlirshëm në hapësirat këtu në Zvicër dhe më gjerë.

ShShV “Shota”, ka krijuar lidhje shpirtërore me artdashësit vendas dhe kulturës sonë kombëtare duke vendosur natyrshëm përjetimin i lidhjeve shpirtërore mes kulturave të ndryshme në shtetin e Zvicrës, duke kontribuar natyrshëm në integrim.

Kjo shkollë, me veprimtarinë e saj 25 vjeçare, të gjerë, të larmishme e me nivel të lartë artistik, ka tërhequr dhe vazhdon të tërheqë vëmendjen e publikut, si atij nga diaspora, ashtu edhe atij zviceran e më gjerë dhe ka ngjallur njëkohësisht interesimin dhe vlerësimin e tyre, të cilat janë shpërfaqur edhe në mediet e kohës nëpërmjet artikujve vlerësues, fotove nga veprimtaritë e shumta, xhirime dokumentarësh, emisione televizive, emisione muzikore, të cilat janë vazhdimisht janë emetuar nga televizionet tona në Republikën e Kosovës dhe në Republikën e Shqipërisë si dhe në mediet e shkruara dhe elektronike e rrjetet televizive zvicerane.

Shkolla Shqiptare e Vallëzimit “Shota”, është bërë ambasadore e vërtetë e kulturës sonë kombëtare në Konfederatën Helvetike ku vepron, si dhe me jehonë e ndikim të fuqishëm edhe në shumë shtete të Evropës ku jetojnë e veprojnë mërgimtarët tanë.

---