Nis punën projekti shqiptaro-zviceran “Orikos”

Ka filluar puna për restaurimin e altarit antik në Parkun Arkeologjik të Orikut, i njohur ndryshe dhe si “Altari i Dionisit”, projekt ky i përbashkët shqiptaro-zviceran, e që po zbatohet nga Këshilli Kombëtar i Restaurimeve në Shqipëri.

Projekti parashikon ndërhyrje restauruese në altar, të cilat konsistojnë në rikompozimin me anë të anastilozës të elementëve përbërës të altarit, përcjell albinfo.ch.

Qyteti antik i Orikut pozicionohet në jug të gjirit të Vlorës, mbi një kodër të ulët gëlqerore të quajtur Paleokastër. Mendimi i studiuesve shqiptarë është se Oriku figuron i themeluar nga korinthasit në vitin 558 p.e.s, pothuajse në të njëjtën kohë me Apolloninë.

Duke filluar nga shek. II, Oriku figuron në të gjitha konfliktet midis Maqedonisë dhe Romës, kurse gjatë periudhës otomane është quajtur Pasha Liman. Aktualisht është zbuluar vetëm një përqindje e vogël e qytetit antik.