Gashi ia dorëzon detyrën Mustafës

Ekrem Mustafa ka marrë pozitën e re të ministrit të Punëve të Brendshme të Kosovës. Atij detyrën në mënyrë zyrtare ia ka dorëzuar tashmë ish-ministri Bejtush Gashi.

Në njoftimin për media të kësaj ministrie thuhet se gjatë ceremonisë së pranim-dorëzimit ata kanë diskutuar për punën dhe çështjet kryesore që kanë të bëjnë me Ministrinë e Punëve të Brendshme, përcjell albinfo.ch.

Ish-ministri Bejtush Gashi i ka uruar Mustafës  detyrën e re të ministrit të Punëve të Brendshme. Ministri Gashi është shkarkuar nga kjo pozitë me kërkesë të partisë që i përket, AKR-së. Kreu i AKR-së, Behxhet Pacolli, ka falënderuar ministrin e shkarkuar, Bejtush Gashi, për të cilin ka thënë se në ditët në vijim do të marrë një përgjegjësi të rëndësishme institucionale. Gashi bëhet ministri i tretë i shkarkuar nga radhët e AKR-së, pasi ishte shkarkuar edhe ministrja e Mjedisit, Albena Reshitaj.