Karta identiteti dhe viza false në autobusin Shqipëri-Greqi

Dy shtetas shqiptarë u arrestuan në Greqi, pasi u janë gjetur 350 karta identiteti gjermane dhe franceze, si dhe 100 viza gjermane.

Personat e arrestuar janë një shofer i autobusit të një linje Shqipëri-Greqi, si dhe ndihmësi i tij, përkatësisht 41 dhe 38 vjeç, shkruajnë mediat shqiptare. Arrestimi i tyre është kryer në rrugën Ionia, pranë Artës, nga departamenti policor i kësaj zone, përcjell albinfo.ch.

Pas kontrollit që është bërë në automjetin e linjës, janë gjetur dokumentet false të fshehura pas ulëses së shoferit, në brendësi të kabinës së tij.

Dy të arrestuarit janë dërguar te prokurori i zonës, ku u është dhënë akuza për falsifikim.

Dyshohet se ata janë pjesëtarë të një rrjeti që kryen trafikimin e refugjatëve nga Greqia drejt vendeve të Evropës Qendrore. Autobusi u sekuestrua, së bashku me dokumentet.