Ndizet për të 7-ën herë e njëjta shtëpi

Zjarri në këtë ndërtesë ka shpërthyer edhe në muajin shkurt, pastaj më 2 gusht, më 17, më 20 e më 31 tetor dhe më 17 nëntor

Në Cyrih, në rrugën Hardstrasse, nr. 96 është një shtëpi “ters”. Pasditen e të dielës aty ka shpërthyer një zjarr, që, për fat, ka kaluar pa pasoja. Por, e çuditshmja në këtë rast është se me zjarrin e djeshëm, po bëhen shtatë herë brenda 9 muajve që kjo shtëpi përfshihet nga flakët!

Një zjarr kishte shpërthyer vetëm 24 orë më parë. Ndërsa para dy javësh ka qenë rasti i para-parafundit. Dhe, atëherë ishte marrë në arrest një person i dyshuar për zjarrvënie të qëllimtë.

Zjarri në këtë ndërtesë ka shpërthyer edhe në muajin shkurt, pastaj më 2 gusht, më 17 dhe më 20 tetor.

Zjarri ka shpërthyer rreth orës 14.30. Kur erdhën policët dhe zjarrfikësit, banorët e ndërtesës tashmë kishin dalë jashtë, ka njoftuar policia e qytetit, e cila ka siguruar gjurmët dhe po i kryen hetimet.

Duke pasur parasysh përsëritjen për të shtatën herë brenda një periudhe të shkurtë të shpërthimit të zjarrit në këtë ndërtesë, policia nuk e përjashton që fjala të jetë për zjarrvënie me qëllim.