Familjen kosovare e strehojnë në pishinë

Një familje refugjate nga Kosova, në mungesë të vendeve në shtëpitë e azilit është vendosur nga e hëna në lokalet e një pishine të mbuluar në Freudenberg. Prindërit dhe tre fëmijët e vegjël do të detyrohen që për disa javë të ardhshme të jetojnë në zhveshtoret e pishinës, e cila është mbyllur aktualisht për shkak të pushimeve.

Pasi që autoritetet e qytetit vetëm të premten kishin marrë nga qeveria e qarkut Arnsberg njoftimin për strehim të kësaj familje, atyre nuk u kishte mbetur kohë për të gjetur strehim tjetër për familjen nga Kosova.

“Na është dashur që shumë shpejt të sigurojmë një vendvendosje të përkohshme për familjen refugjate”, thotë kreu i qytetit Freudenberg, Eckhard Günther për dervesten.de. E vetmja godinë që mund të merrej në konsideratë me këtë rast ishte pishina e mbyllur pak kohë më parë, thotë ai.