Ik nga burgu, i maskuar me burka

Pasi ka veshur një burka, i maskuar si grua, ka kaluar pa u vënë re para gardianëve të burgut

Një i burgosur në një burg në Nyborg të Danimarkës ka pasur një ide fare origjinale për të shpëtuar nga vuajtja e mëtejme e dënimit.

Ai, thjeshtë, ka veshur një burka (mbulesë për gjithë trupin, e grave myslimane) dhe me të, i maskuar si grua, ka kaluar pa u vënë re para gardianëve të burgut. Përfundimi i këtij aksioni, e çoi atë jashtë mureve të burgut, në liri.

Ai kishte pasur para kësaj, në vikendin që shkoi, një vizitë të një burri dhe një gruaje. Ndërsa autoritetet e burgut e kishin vënë re humbjen e të burgosurit të hënën. Personi në fjalë e kishte lëshuar burgun bashkë me vizitorin e tij mashkull, ndersa gruaja kishte dalë pas tyre, njoftojnë mediet daneze.

Mundësia që të ndodhte diç e tillë është një dështim i punonjësve të burgut, kanë deklaruar përfaqësues të sindikatës së gardianëve për agjencitë e lajmeve. Për këtë arsye duhet rishikuar rregullat e vizitave në burgje.

I ikuri ishte një i huaj rreth 30 vjeç dhe nuk konsiderohet i rrezikshëm. Policia ka kontrolluar disa lokalitete në kërkim të tij dhe ka përcjellë informacionet edhe në vendet e Zonës së Shengenit.