Neonazistë në ushtrinë e Zvicrës

Njoftohet për rreth 30 raste ku pjesëtarë të forcave të armatosura zvicerane kanë mbajtur në internet qëndrime të ekstremit të djathtë

Disa dhjetëra neonazistë shërbejn në ushtrinë e Zvicrës, mjaft nga të cilët mbajnë edhe pozita komanduese. Gazeta “SonntagsZeitung” me rastin e një hulumtimi gazetaresk që ka bërë, ka arritur në informata mjaft shqetësuese lidhur me këtë çështje.

Disa nga neonazistët që janë me shërbim në armatë nuk ngurrojnë të marrin poza në rrjetin e internetit me shenja të djathtizmit ekstrem.

Më i njohuri ndër neonazistët e Zvicrës në përgjithësi, kryetari i PNOS (Partia e Zviceranëve të Orientuar Kombëtarisht) Dominic Lüthard, ka mbaruar në fund të vitit 2011 shërbimin në këmbësorinë malore.

Në marsin e ardhshëm ai do të angazhohet sërish në armatë. Dhe kjo do të ndodhë, pavarësisht faktit se Lüthard ka qenë tashmë i dënuar penalisht dhe prej vitesh paraqitet publikisht si ekstremist i djathtë.

SonntagsZeitung raporton për rreth 30 raste ku pjesëtarë të rinj të forcave të armatosura zvicerane kanë mbajtur në internet qëndrime të ekstremit të djathtë.

Ata kanë pozuar në ambiente ku në prapavi ka pasur kryqe të thyer ose janë fotografuar të maskuar, duke bërë me dorë përshëndetjen hitleriane. Ajo që shihet si më alarmuese është se një numër ushtarakësh me ide ekstremiste.

Politikanë të gjithë spektrit politik, të cilët në partitë e tyre merren me çështje të sigurisë shprehen të indinjuar me këtë gjendje dhe kërkojnë përjashtimin e menjëhershëm të ekstremistëve nga radhët e ushtrisë.

Mirëpo, ushtria i ka duart e lidhura për të bërë ndonjë veprim në këtë drejtim. Siç thotë zëdhënësi i ushtrisë, Christoph Brunner, ligjet në fuqi nuk lejojnë përjashtime preventive nga armata. Për këtë arsye, komisioni për politikën e sigurisë (Sik) është duke shqyrtuar mundësinë e ndryshimit të bazës ligjore që rregullon këtë çështje.