Video satirike me Blocherin si refugjat somalez

Në videon paraqiten dy politikanët zviceranë Blocher dhe Maurer, me fytyra të nxira që ngjajnë me refugjatë somalezë

Në një videoincizim të saj organizata Amnesty International (AI) ka vënë në lojë politikanin e njohur të SVP-UDC-së Christoph Blocher, gjegjësisht politikën jotolerante të tyre ndaj të huajve. Ashpërsimi i fundit i Ligjit të Azilit i ka shërbyer AI-së si pretekst për këtë video satirike me tone ironike si dhe pllakate të ndryshme. Në video paraqiten Chtristoph Blocher dhe bashkëpartiaku i tij Ueli Maurer si azilkërkues nga Somalia.

Fushata e AI dhe OJQ-ve tjera zvicerane është “një apel drejtuar opinionit zviceran që të angazhohet për një politikë korrekte dhe me dinjitet njerëzor”. 

Në videon e përmendur, paraqiten  dy politikanët zviceranë me fytyra të nxira që ngjajnë me refugjatë somalezë. Në video duket po ashtu edhe koka e dhisë Zottel, që është  maskotë e SVP-së, duke u zier në kazan. Dy svp-istët janë detyruar që nga uria dhe varfëria të ziejnë maskotën e tyre.

AI e ka cilësuar fushatën e saj si satirike, që përpiqet për solidaritet dhe mirëkuptim, ndonëse duke i ngjyrosur me të zezë kundërshtarët e saj politikë. Kjo mënyrë po shfrytëzohet  gjithnjë më shumë në fushatat politike në Zvicër . “Provokimet po bëhen pjesë gjithnjë më e popullarizuar e veprimit politik dhe fushatave politike “ ka deklaruar analisti politik dhe këshilltar i fushatave politike Mark Balsiger për emisionin  “Tagesschau” të sf1.

Me fushatën e saj më të re, AI po bëhet organizata e parë e stabilizuar që ka arritur në atë shkallë sa të udhëheqë sulme të drejtpërdrejta dhe të personifikuara. Më parë, fushata të tilla, në kufi të të lejuarës, ka zhvilluar zakonisht SVP-UDC-ja.

Fushata drejtohet kundër miratimit të ligjit të ashpërsuar për azilin, që ditë më parë u miratua me klauzolën për hyrje urgjente në fuqi, nga të dy dhomat e parlamentit të Zvicrës. Por partisë SVP edhe ky ligj nuk i duket mjaft i ashpër. Për këtë arsye ajo ka nisur të dielën një iniciativë për ashpërsimin e mëtejmë të ligjit.