Swisscoy-t i shtohen radhët

Këshilli Federal i Zvicrës ka lejuar edhe një përforcim të personelit ushtarak për 15 persona

Zvicra, gjegjësisht kontigjenti i saj ushtarak në Kosovë Swisscoy, edhe në vitin që vjen do të mbajë komandën regjionale në veri të vendit. Për këtë qëllim, Këshilli Federal i Zvicrës ka lejuar edhe një përforcim të personelit ushtarak për maksimalisht 15 persona.

Siç njofton Departamenti Federal i Mbrojtjes, me këtë personel shtesë, do të jetë e mundshme të mbahet komanda mbi ekipet që kanë për detyrë mbledhjen e informatave për Kfor-in në veri të Kosovës.

Ekipet në fjalë janë përgjegjëse për vlerësimin e situatës atje. Përmes kontakteve me popullatën lokale, ato kanë për detyrë të konstatojnë në mënyrën më të shpejtë të mundshme zhvillimet negative në terren.

Zvicra ushtron komandën për ekipet e përmendura ose Joint Regional Detachement (JRD) Nord, nga janari i vitit 2012. Edhe me rastin e marrjes së komandës në fjalë, qeveria e Zvicrës i kishte lejuar Swisscoy-t shtimin e personelit për 15 veta.

Komandën në JRD një shtet e merr sipas rregullit për 12 muaj. Por në maj të këtij viti, përjashtimisht, Nato e ka lutur Zvicrën që ta marrë komandën edhe për një vit tjetër.

Swisscoy ka gjithsej 220 ushtarë. Deri më tash në Kosovë kanë shërbyer 4200 ushtarë zviceranë në kuadër të Kfor-it.

Personeli i Swisscoy-t është i armatosur vetëm për vetëmbrojtje.

Parlamenti i Zvicrës ka miratuar angazhimin e ushtarëve zviceranë në Kosovë për periudhën deri më 31 dhjetor 2014.