Operacioni i suksesshëm, pacienti vdiq!

Sipas një studimi të ri, 4 për qind të pacientëve vdesin pas ndërhyrjes operative, gjegjësisht para lëshimit nga spitali

Një studim i publikuar rishtas ka sjellë një ndryshim në perceptimin e deritashëm për rastet e vdekjeve në sallat e operacionit.  Vdekja e pacientëve para se të lëshojnë spitalin është dukuri dyfish më e shpeshtë se sa është menduar deri më tash, shkruan revista “Lancet” duke iu referuar studimit më të ri “European Surgical Outcomes Study» (EuSOS). 

Sipas studimit në fjalë, 4 për qind të pacientëve vdesin pas ndërhyrjes operative, gjegjësisht para lëshimit nga spitali.

Por, kjo përqindje varion shumë, në varësi nga vendi. Kështu, më së paku pacientë vdesin pas operacionit në spitalet islandeze, “vetëm” 1.2% ndërsa më së shumti në ato letoneze, 21.5 për qind ose më shumë se çdo i pesti pacient! Shkalla e vdekjes në Zvicër është 2%.

Edhe po u hoqën faktorët rëndues, si ai i rasteve emergjente  ose i të sëmurëve nga kanceri, dallimet në statistika sa u përket vdekjeve pas operative në mes të vendeve në fjalë mbeten të mëdha.

Më së shumti vdesin pacientë në Poloni, Letoni dhe Rumani ndërsa nga vendet e Evropës perëndimore, shanet më të këqija për të mbijetuar operacionin i kanë pacientët nga Irlanda, Italia, Belgjika, Portugalia dhe Franca.