Duhanxhinjtë fillojnë kundërsulmin!

Federata e gastronomëve të kantonit të Cyrihut GastroZürich është duke shqyrtuar një iniciativë për zbutjen e ndalesës për pirje të duhanit.

Pas fiaskos që pësoi në nivel të shtetit iniciativa për ashpërsimin e ndalimit të duhanit, gastronomët kanë filluar të shpresojnë se janë pjekur kushtet për një kthesë në drejtim të kundërt. Kështu, federata e gastronomëve të kantonit të Cyrihut GastroZürich është duke shqyrtuar lancimin e një iniciative të re kantonale për zbutjen e ndalesës për pirje të duhanit.

“Ne do të bëjmë një konsultim të menjëhershëm me anëtarësinë tonë për të vendosur nëse do ta marrim iniciativën menjëherë ose jo”, ka thënë për radion DRS kryetari i GastroZürich Ernst Bachmann.

Ndërkohë, ideja nga Cyrihu nuk gjen mbështetje  e duhur nga federata e gastronomüëve në nivel federal, GastroSuisse. “Askujt nuk mund t`i ndalohen mendimet. Por unë mendoj se në momentin aktual kjo nuk është e mundur”, ka thënë kryetari i GastroSuisse Klaus Künzli.

Ndalesa e duhanit në kantonin e Cyrih ka filluar në vitin 2010 dhe ajo në këtë kanton shkon më larg se që kërkohet në ligjin federal. kështu, në Kantonin e Cyrihut, fjala vjen, ndalohen edhe lokalet e vogla ku konsumohet duhani.