20 vjet burg tre shqiptarëve, për plaçkitje trezorësh

Procesi është zhvilluar nën masa të forta sigurie për shkak të frikës nga një “aksion për çlirimin” e të akuzuarve

Gjykata e Landit në Landshut u ka shqiptuar dënime prej gjithsej 20 vitesh burg 3 shqiptarëve, pjesëtarë të një bande plaçkitësish të trezorëve.

Bekim B., një pronar 40 vjeçar kafiterie nga Erdingu është dënuar me 7.5 vjet burg, për gjashtë raste të vjedhjes së rëndë banditeske, një përpjekje për vjedhje të rëndë dhe për dëme të shkaktuara materiale. Depoisti 40 vjeçar Vilson G., po ashtu nga Erdingu është dënuar me 6 vjet e 3 muaj burg ndërsa tekniku  Agron G., ka marrë dënimin me 5 vjet e gjashtë muaj.  Të dy këta janë dënuar po ashtu për vjedhje të rëndë dhe për shkaktim dëmi material.

Akuza fillimisht ngarkonte 11 pjesëtarë të bandës për gjithsej 50 raste të vjedhjes banditeske dhe shkaktim dëmesh materiale. Preja që kishin plaçkituar ata vlerësohej rreth 450 mijë euro ndërsa dëmi i shkaktuar rreth 200 mijë euro. Ata kishin vjedhur, kryesisht duke thyer trezorët, në seli firmash dhe fabrikash të ndryshme në një regjion të gjerë të Gjermanisë.

Vitin e kaluar qenë dënuar 7 pjesëtarë tjerë të bandës së njëjtë në dy procese të ndryshme gjyqësore. Ata ishin dënuar me 20 vjet burg.

Procesi i fundit gjyqësor, që ka përfunduar të mërkurën, ka zgjatur 1 vjet ndërsa akuza për këtë pjesë konsiston në 6 vjedhje banditeske dhe një vjedhje Të thjeshtë”. Preja e vjedhur vlerësohet 135 mijë euro ndërsa dëmi i shkaktuar rreth 24 mijë euro, shkruan Wochenblatt.de.

Shpallja e vendimeve gjyqësore është zhvilluar nën masa të forta sigurie për shkakun se ishte përhapur fjala për mundësinë e një “aksioni për çlirimin” e personave ndaj të cilëve zhvillohej procesi gjyqësor.