Jay Z ftohet për të dëshmuar për shitjen e brendit të rrobave

Gjykata Federale në Nju-Jork ka ftuar për dëshmi këngëtarin Jay Z. Ai do të dëshmojë më 15 maj lidhur me hetimin që ka bërë Komisioni amerikan për këmbim dhe siguri, që lidhet me shitjen e brendit të rrobave të këngëtarit, ‘Rocawear’, kompanisë tjetër ‘Iconix Brand Group’.  

Në Manhattan, gjykatësi ka thënë se Jay Z, me emër të vërtetë Shawn Carter, ka dështuar që t’i përgjigjet këtij komisioni në nëntor dhe shkurt, pavarësisht përpjekjeve të vazhdueshme të komisionit që të caktojë takim me të.  

Gjykatësi tha se dëshmia e reperit u vonua tashmë shumë dhe nuk e ka ndërmend ta tolerojë më këtë. Jay Z, në këtë seancë, u përfaqësua nga avokati i tij, Alex Spiro, përcjell albinfo.ch.  

Brendi i rrobave i Jay Z ishte shitur në vitin 2007 për 204 milionë dollarë. Arsyetimi i avokatit ndërkaq pse Jay Z nuk u paraqit në seanca ishte se po përgatitet për turne botëror.  

Dhe sipas avokatit të tij, dëshmia e tij nuk është aspak relevante me hetimet. Jay Z ndërkaq mbetet reperi më i njohur aktual me hitet si “Hard Knock Life,” “99 Problems” dhe “Big Pimpin'”.  Ai ka fituar 21 shpërblime Grammy.