30 viktima në aksidentet e transportit publik gjatë një viti

Sipas raportit, 21 persona kanë humbur jetën në aksidentet në rrjetin hekurudhor. Viktimat tjera në transportin publik rezultojnë nga aksidentet e tramvajëve, autobusëve dhe trolejbusëve

Ilustrim

30 persona kanë humbur jetën gjatë vitit të kaluar në aksidentet në të cilat janë përfshirë mjetete e transportit publik. Ky numër është për një më i madh se ai i vitit 2016. Kështu thuhet në raportin më të ri për sigurinë gjatë vituit 2017, të publikuar sot nga Zyra Federale për Komunikacion (BAV).

Sipas raportit në fjalë, 21 persona kanë humbur jetën në aksidentet në rrjetin hekurudhor. Por duhet theksuar asnjë prej tyre nuk ka qenë pasagjer i trenave. Bëhet fjalë kryesisht për viktima në stacione trenash, që janë goditur nga trenat, për vetëvrasje ose aksidente ku personat janë ngjitur në telat e trenave që përçojnë energji elektrike etj.

Viktimat tjera në transportin publik rezultojnë nga aksidentet e tramvajëve, autobusëve dhe trolejbusëve.

Gjatë po kësaj periudhe kohore, në transportin publik janë regjistruar 135 persona të lënduar rëndë.

Sipas Zyrës Federale për Komunikacion (BAV) Zvicra sa i përket aksidenteve në transportin publik ka një pozicion të mirë në nivelin ndërkombëtar.