Bilanci i punës së Evelin Widmer-Schlumpf

Evelin Widmer Schlumpf ka lënë pas një gjysmë viti turbulent si kryetare e Konfederatës zvicerane. Ajo më shumë është marrë me çështje financiare dhe tatimore.

Widmer-Schlumpf për herë të parë ka folur në një ballafaqim me gazetarët për dorëzimin në SHBA të emrave dhe të të dhënave bankare nga Zvicra.

Widmer-Schlumpf ka theksuar me këtë rast se përgjegjësia qëndron te bankat dhe te Autoriteti Financiar (Finma).

Ajo ka thënë se pa dorëzimin e të dhënave, gjendja do ishte më e vështirë në bankat kantonale zvicerane. Vendimi i Këshillit Federal ka pasur qëllim të tërheqë një vijë në zgjidhjen përfundimtare të mosmarrëveshjeve me Shtetet e Bashkuara të Amerikës.

Këshilli Federal ka autorizuar bankat për të siguruar të dhënat si pjesë e mbrojtjes për veten e tyre, tha ajo me rastin e paraqitjes së një bilanci të punës gjysmëvjeçare në krye të Këshillit Federal të Zvicrës.

“Nëse bankat po i mbajnë ende të dhënat apo jo, këtë nuk mund ta verifikojë qeveria”, tha Widmer-Schlumpf.

Edhe në gjysmën e dytë të vitit Widmer- Schlumpf do të jetë presidente dhe ministre e Financave e Konfederatës zvicerane.

Këshilli Federal në vjeshtë do të marrë një vendim për reformën e taksave ekologjike.

Ndërsa qytetarët zviceranë do të vendosin në një referendum nëse do të mbahet për marrëveshjet tatimore ndërmjet Zvicrës me Gjermaninë, Britaninë e Madhe dhe Austrinë.

Edhe në gjysmën e dytë të mandatit mbetet shumë punë për Widmer-Schlumpf. Ajo tashmë ka konfirmuar se ka ftuar në një takim presidentin francez, Francois Hollande.