Gjermania është partneri kryesor tregtar i Maqedonisë

Gjermania mbetet tregu kryesor eksportues i Maqedonisë me afro 2.4 miliardë eksport në vitin e kaluar

Afro gjysma, apo 47 për qind e eksportit të Maqedonisë shkon për Gjermani, ku dominojnë pjesët e industrisë automobilistike që prodhojnë në fabrikat e zonave të lira ekonomike, shkruan gazeta KOHA në Shkup, përcjell albinfo.ch.

Të dhënat statistikore tregojnë se eksporti i tërësishëm i Maqedonisë në vitin 2017 ishte i vlefshëm afër 5 miliardë euro, ndërsa nga ana tjetër, importi në vitin e kaluar ishte i vlefshëm afër 6.8 miliardë euro.

Sipas këtyre tregueseve del se Gjermania mbetet tregu kryesor eksportues i Maqedonisë me afro 2.4 miliardë eksport në vitin e kaluar. Në ekonominë më të fuqishme evropiane më së shumti eksportohen katalizatorët dhe pastruesit e gazrave të fabrikës “Xhonson Meti” të dedikuara për industrinë automobilistike që vjet arritën vlerën e shitjes jashtë prej 1.3 miliardë euro, apo një e treta e totalit të eksportit vendor.

Bullgaria, me vlerë prej 293 milionë eurosh, renditet në vendin e dytë, ku eksportojnë më shumë prodhime. Në shtetin fqinj lindor në eksport dominojnë xehet, duhani dhe gypat e çelikut.

Në vendin e tretë, sipas vlerës së eksportit me 219 milionë euro, renditet Serbia, ku kryesisht eksportohet energji elektrike, ilaçet e Alkaloidit, prodhime të industrisë metalurgjike, rrush për konsum, domate të freskëta dhe ëmbëlsira industriale. Këto pesë prodhime përbëjnë afër 30 për qind të eksportit në Serbi, apo afër 70 milionë euro.

Kosova renditet në vendin e katërt si tregu më i rëndësishëm, ku plasohen prodhimet nga Maqedoni me një vlerë prej afro 200 milionë euro. Në vend të parë sipas vlerës së eksportit në Kosovë renditen karburantet e rafinerisë Okta me vlerë prej afër 20 milionë euro, ndërsa në vendin e dytë është çimentoja e fabrikës Usje me vlerë prej afër 13 milionë euro.