Historia e kaçakëve dhe kundërshtarët e aplikimit të taksës për rrugën në Shqipëri

Protesta e të shtunës së kaluar ku përfundoi me përleshje me policinë në Rrugën e Kombit, ka bërë jehonë edhe në mediat kryesore ndërkombëtare. Së fundi rreth saj ka shkruar edhe “Der Standard”.

Me titull “Kaçakët dhe kundërshtarët e aplikimit të taksës për rrugën në Shqipëri”, autorja Adelheid Woelfl shkruan se histori të ngjashme të protestave ka pasur edhe në Slloveni, por gjithashtu tregon edhe historinë e kaçakëve nga Perandoria Osmane, të cilët kundërshtonin taksat kundrejt Portës së Lartë me të “drejtën e vjetër”.

Megjithatë banorët e Kukësit janë “thuajse të detyruar” për të paguar këtë taksë dhe gjithashtu janë tepër të varfër. Një pjesë e banorëve këndej jetojnë me vetëm 150 euro në muaj, përcjell albinfo.ch. Shumë shqiptarë këtë taksë e quajnë si “taksa e grabitjes”, ndërsa protesta mbështetet nga opozita.

“E gjithë kjo të kujton pak ngjarjet e para disa viteve në Maribor të Sllovenisë, kur banorët protestuan kundër radarëve në qytet, që ata të mos jenë të detyruar të paguajnë gjobat,” shkruan më tej e majta austriake. “Kjo protestë më pas u shtri në gjithë Slloveninë.”

“Hakmarrja kundër të pasurve”

Historiani i ndjerë britanik, Eric Hobsbawm, e përshkruante rebelimin social si një protestë lokale të bashkëkombasve kundër shtypësve dhe varfërisë, një “hakmarrje kundër të pasurve dhe shtypësve” dhe se është “një ëndërr e turbullt për të vendosur barriera për ta, një kompensim për padrejtësinë personale”.

Për këtë banditët socialë shihen nga shumica e shoqërisë jo si kriminelë, por si vlerë e shoqërisë. “Kështu ishte më parë me kaçakët, kështu është sot me kundërshtuesit e aplikimit të taksës rrugore”.