Zaev: Jemi në bisedime me BESËN dhe PDSH, përshëndet vendimin e OBRM

Kryeministri i Maqedonisë, Zoran Zaev, e ka mirëpritur vendimin e opozitares OBRM-PDUKM, për të marrë pjesë në punimet e parlamentit.

“Grupet e punës punojnë dhe një pjesë e zgjidhjeve ligjore janë harmonizuar, ndërsa disa tani më janë harmonizuar tërësisht. Kjo do të thotë se pritjet janë se deri më 17 prill deri te Raporti i KE-së t’i sjellim zgjidhjet ligjore në Parlament. Kryetari i Kuvendit më tha se planifikon më 10 prill seancë të re në të cilën do të jenë në rend dite këto zgjidhje, të cilat janë pjesë e pakos 3-6-9 dhe janë pjesë e reformave të përgjithshme në Maqedoni dhe tani më janë harmonizuar me opozitën”, ka thënë Zaev, duke shtuar se kërkesa e interpelancës nga opozita do rishikohet pas votimit të ligjeve për reforma.

Në lidhje me informacionet për bisedime për zgjerimin e shumicës parlamentare, Zaev tha se është në bisedime me Lëvizjen BESA dhe PDSH, si dhe me disa parti të komuniteteve turke dhe rome.