Në gusht vjen bankënota e re 200 frangëshe

Pas bankënotave 50, 20 dhe 10 frangëshe, kjo e 200 frangave do të jetë e katërta në serinë e re. Ndërsa dy bankënotat e mbetura, ajo e 1000 frangave dhe tjetra, e 100 frangave, pritet që në dizajn të ri të editohen gjatë vitit 2019

Në muajin gusht Zvicra do të ketë një bankënotë të re 200 frangëshe. Banka Nacionale Zvicerane (SNB) ka bërë të ditur se kjo bankënotë e serisë së re do të prezantohet më 15 gusht ndërsa në qarkullim do të hyjë nga 22 gushti, shkruan sda.ch.

Bankënota e re që do të ketë tone të ngjyrës së kafesë, nga ana e dizajnit do të tematizojë segmentin shkencor të Zvicrës, shkruan SNB në njoftimin e saj.

Pas bankënotave 50, 20 dhe 10 frangëshe, kjo e 200 frangave do të jetë e katërta në serinë e re, transmeton albinfo.ch. Ndërsa dy bankënotat e mbetura, ajo e 1000 frangave dhe tjetra, e 100 frangave, pritet që në dizajn të ri të editohen gjatë vitit 2019.

Te të gjitha bankënotat e serisë së re ekzistojnë gjithsejt 15 karakteristika që kanë të bëjnë me sigurinë. Me këtë, Banka Nacionale e Zvicrës synon që serinë e re ta bëjë më të sigurt nga përpjekjet për falsifikim. Në mesin e këtyre karakteristikave ose shenjave dalluese janë kryqi transparent i flamurit zviceran dhe një glob i ngjyrosur me dritë, përcjell albinfo.ch. Këto kartëmonedha do t`i kenë po ashtu edhe shiritat e sigurisë. Në shiritin me ngjyrën e argjendtë mund të shihen harta e Zvicrës, rrjeti hekurudhor, një listim i tuneleve më të gjatë të trenave dhe numri 10.

Edhe pas hyrjes në qarkullim të bankënotave të serisë së re, bankënotat e vjetra njëherë për njëherë do ta ruajnë vlefshmërinë e tyre.