Kuvendi i Kosovës, seancë solemne për Epopenë e UÇK-së 

Kuvendi i Kosovës ka mbajtur seancë solemne për nder të shënimit të vitit jubilar të 20-vjetorit të Epopesë së Ushtrisë Çlirimtare të Kosovës. Kryeministri i Kosovës, Ramush Haradinaj, luftën dhe sakrificën e Jasharëve e ka quajtur “rast unik për liri e dinjitet”.

“Sot kur po e shënojmë 20-vjetorin e epopesë dhe rënien e Jasharëve, duhet të shohim ku jemi në raport në ndërtimin e shtetit modern dhe në raport me familjet e dëshmorëve, sa u kemi qëndruar afër”, tha Haradinaj.  Kryeministri ka bërë thirrje për unitet.  

“Ne kemi ecur 20 vjet në liri dhe të arriturat janë të dukshme. Nga këtu, i ftoj të gjithë shqiptarët, partitë politike për unitet institucional për t’i mbrojtur idealet e lirisë dhe Kosovën e së ardhmes, ku qytetarët lëvizin lirshëm si pjesë e NATO-s dhe OKB-së. Ndërsa kryetari i Kuvendit, Kadri Veseli, ka thënë se sakrifica e Adem Jasharit dhe familjes së tij është ‘rast unik në historinë e njerëzimit’. Sipas tij, familja Jashari përçoi mesazh se asgjë nuk është më e çmueshme se liria.

“Vitet po kalojnë, por kujtimi për 5 marsin e vitit 1998 mbetet monument i përjetshëm në zemrat e mbarë kombit tonë”, ka thënë ai.