Fillon vrapimi 100 kilometra i gjatë, “Shtegu i shpresës”

Në këtë vrapim po marrin pjesë edhe Ish-presidentja e Kosovës, Atifete Jahjaga, ambasadori britanik Ruairi O’Connell, kryetari i Drenasit, Ramiz Lladrovci dhe ai i Skenderajt, Bekim Jashari

Ka filluar sot nga Prekazi, do të kalojë nëpër disa pika historike të Kosovës dhe do të përfundojë nesër, më 4 mars në Koshare. Ky është “vrapimi i gjatë 100 kilometra i quajtur “Shtegu i shpresës”, që po zhvillohet në 20 vjetorin e fillimit të luftës në Kosovë.

Në këtë vrapim po marrin pjesë shumë personalitete nga jeta politike e Kosovës ndërsa në një moment janë bërë bashkë edhe Ish-presidentja e Kosovës, Atifete Jahjaga, ambasadori britanik Ruairi O’Connell, kryetari i Drenasit, Ramiz Lladrovci dhe ai i Skenderajt, Bekim Jashari, shkruan indeksonline.

Jahjaga ka postuar disa fotografi në profilin e saj në Facebook, ku ka përgëzuar organizatorët e kësaj nisme: “Në përkrahje të Shtegut të Shpresës, sot mora pjesë në vrapin 100 kilometërsh të organizuar nga Kosova Trail Running Association për të shënuar 20 vjetorin e luftës për çlirimin e Kosovës dhe 10 vjetorin e shpalljes së pavarësisë. Përgëzime organizatorëve për një iniciativë të tillë e cila pati për qëllim përkujtimin e sakrificave të dëshmorëve të Kosovës të cilët kontribuan për lirinë që ne sot e gëzojmë”.