Bushati në Komision thotë se Meta ka qenë në dijeni për negociatat me Greqinë

Ministri i Jashtëm, Ditmir Bushati, në raportimin e tij në Komisionin për Integrime ka deklaruar se presidenti Meta ka qenë në dijeni të negociatave me Greqinë që kur ai ishte në krye të Kuvendit.

“Pas takimit të kryeministrit Rama dhe Tsipras në samitin e NATO-s u ra dakord që krahas mekanizmit diplomatik, dy ministrat e jashtëm, së bashku me ekipe nga institucione të ndryshme të shteteve në fjalë, të uleshin dhe të diskutonin në një mënyrë edhe më intensive, siç ishin takimet e Kretës dhe Korçës”, ka thënë Bushati gjatë raportimit, përcjell albinfo.ch.

Bushati ka treguar se presidenti Meta nuk ka lëshuar plotfuqishmëri për të vazhduar bisedimet dhe se ka bërë edhe disa kërkesa shtesë. “Koncepti i plotfuqishmërisë, i cili i jep garanci palës tjetër që lista e këtyre njerëzve ka mbështetjen e instancës shtetërore. Lista e njerëzve mbi bazën e këtij ligji është e rëndësishme që të jetë mbi bazën e përfaqësimit institucional. Presidenti ka kërkuar emrat, CV-të e tyre dhe ne i kemi vënë në dispozicion emrat, funksionet dhe CV-të. Institucionet do të përgjigjen për këtë çështje, por nuk është normale për një shtet që të diskutojmë emrat në publik”, ka thënë Bushati.