Bebe Rexha vazhdon kontratën me “BMG”

Keystone (Photo by Jordan Strauss/Invision/AP)

Kompania e njohur muzikore “BMG Music Publishing” ka njoftuar se Bebe Rexha ka rinovuar marrëveshjen e saj me kompaninë për publikimin e projekteve.

Rexha kishte nënshkruar për “BMG” në vitin 2013, kur shkroi hitin “Monster” të Eminemit dhe Rihannas. Që nga ajo kohë ajo ka grumbulluar më shumë se 11 milionë shitje të këngëve, dhe 3.35 miliardë dëgjime.

Rexha ka dominuar kohëve të fundit në top-listën “Country” amerikane me hitin “Meant to Be”.

“Të punosh dhe të shohësh shpërthimin e Bebe Rexhës gjatë viteve ka qenë krenari për ‘BMG’”, ka thënë shefi i marketingut të kompanisë, Zach Katz në një njoftim, transmeton Albinfo.ch.

“Puna e palodhshme që ka bërë është provë për suksesin e saj të madh, duke u bërë ndër tekstshkrueset më të kërkuara dhe artistet më të mira të reja sot”, ka shtuar ai.

Këngëtarja shqiptare në anën tjetër ka thënë se suksesi i saj është falë punës ekipore, duke shtuar se është tejet e lumtur për marrëveshjen.