Fituesi i Sanremos, Ermal Meta, thotë se nuk e priste triumfin

Këngëtari shqiptar, Ermal Meta, i cili këtë edicion u shpall fituesi i festivalit Sanremo, ka thënë se ai nuk e priste të triumfonte aq më pak pas akuzave për kopjim të këngës.

“Fabrizio më kontaktoi në qershor. Ai më ka pëlqyer gjithmonë si artist dhe pranova menjëherë. Pas atentatit në koncertin e Ariana Grande, fansat kishin frikë të vinin në koncertet tona, por kur e lë veten në dorë të frikës… Prandaj vendosëm të merrnim pjesë me këtë këngë”, shpjegoi Meta në një interviste telefonike në emisionin “Wake Up” në TCH, përcjell albinfo.ch.

Ai ka thënë se ata u trishtuan në fillim kur u bë pezullimi i këngës. “U trishtuam shumë, por e dinim se kishim të drejtë. Ne e kishim deklaruar që refreni ishte nga një këngë tjetër, e shkruar nga njëri prej nesh. Ndoshta disa gazetarë nuk e dinin ose nuk donin ta dinin. Thanë diçka të pasaktë. Kënga kishte refren të njëjtë, por ishte refreni ynë”, shtoi ai.