Haradinaj: Nuk më është refuzuar viza për SHBA, jam në pritje

“Pres edhe për vizë deri kur të ma japin. I besoj Kosovës! I besoj Amerikës! Jam ende në procedurë për vizë”, ka shkruar Haradinaj

Kryeministri i Kosovës, Ramush Haradinaj, ka reaguar rreth raportimeve se atij i është refuzuar viza e Shteteve të Bashkuara të Amerikës. Përmes një postimi në Facebook, ka bërë të ditur se ende është në procedurë të marrjes së vizës amerikane.

“Më 24 mars ’98, kemi pasur momente jete apo vdekje. Kështu ka vazhduar deri më 24 mars ‘99, kur Amerika dhe NATO-ja na dolën në ndihmë. Kurrë nuk do ta harroj. Momente të vështira pritjeje deri më 24 mars ‘99. Pres edhe për vizë deri kur të ma japin. I besoj Kosovës! I besoj Amerikës! Jam ende në procedurë për vizë”, ka shkruar Haradinaj në Facebook.

Për lajmin, ka reaguar deputetja e Vetëvendosjes, Donika Kadaj Bujupi, e cila ka thënë se nëse vërtet SHBA-ja ia ka refuzuar kryeministrit vizën, ai duhet të japë dorëheqje.

Por, deklaratat që u dhanë në mediat e Prishtinë, u dukëm më shumë si trillime se sa të vërteta. Ramush Haradinaj ishte njëri nga liderët e rrallë nga Ballkani që u ftua vitin e kaluar në Lutjet e Mëngjesit nga presidenti amerikan Donald Trump. Por, ky udhëtim doli i pafat, pasi Ramush Haradinaj u arrestua nga autoritetet franceze nën akuzat e lëshuara nga Beogradi për krime lufte dhe qëndroi tre muaj në Francë.