Bora vështirëson rrugët në qarkun e Kukësit

Reshjet e borës kanë vështirësuar qarkullimin në qarkun e Kukësit, njoftojnë mediet shqiptare. Lartësia e borës varion në akset rrugore nga 3 deri në 15 cm në rajonin e tunelit të Kalimashit dhe mbi 10 cm në Valbonë.

Aktualisht të gjitha akset rrugore që përshkojnë qarkun e Kukësit janë të qarkullueshme pa zinxhirë.

Nga firmat kontraktuese gjatë gjithë kohës ka vazhduar puna për hedhjen e kripës e pastrimin nga dëbora të akseve rrugore.

Njoftohet se po punojnë intensivisht 14 borëpastruese për mbajtjen në gatishmëri të këtyre akseve.