Pas Zvicrës edhe Austria pezullon sigurimet me Kosovën

Edhe Qeveria austriake i ka kërkuar parlamentit që të pezullojë marrëveshjen për çështje sociale me Kosovën.

Kosova nuk do të ketë probleme vetëm me Zvicrën sa i përket sigurimeve shoqërore. Edhe Qeveria austriake i ka kërkuar parlamentit të këtij vendi që të pezullojë marrëveshjen për çështje sociale me Kosovën.

Për të vetmen arsye se në Kosovë ende mungon një sistem shëndetësor. Deri tani ishte aplikuar një marrëveshje e përkohshme mbi sigurimet, e cila ishte realizuar mes Austrisë dhe ish-Jugosllavisë.

Për këtë ishin dakorduar dyja shtetet mënjëherë pas njohjes së pavarësisë së Kosovës nga ana e Austrisë.

“Pasi Kosovës, megjithatë, ende i mungon një sistem i sigurimit shëndetësor, dhe i sigurimit nga aksidentet dhe papunësia, dhe pasi Kosova në aspektin e sigurimeve të pensionet ende nuk ka mbështetur bazat e marrëveshjes, Austria do ta pezullojë marrëveshjen e më parshme”, thuhet në komunikatën për media të qeverisë austriake.

Qeveria austriake ia ka paraqitur Parlamentit vendimin për miratim. Në të njëjtën kohë Austria synon përfundimin e shpejtë të një marrëveshjeje të re, thuhet në këtë njoftim të Qeverisë austriake.

Në bazë të statistikave shtetërore të Austrisë në këtë vend jetojnë rreth 30.000 qytetarë me prejardhje nga Kosova.