Front i gjerë kundër AUNS-it

AUNS kërkon që të gjitha marrëveshjet "e rëndësishme" që Zvicra do t`i lidhë me shtetet tjera, t`i nënshtrohen referendumit

Lëvizja radikale e djathtë “Aksioni për një Zvicër të Pavarur dhe Neutrale “(AUNS) ka nisur iniciativën “Marrëveshjet shtetërore para popullit”. Me këtë nismë ajo synon që të gjitha marrëveshjet “e rëndësishme” që Zvicra do t`i lidhë me shtetet tjera, para se të hyjnë në fuqi, duhet t`i nënshtrohen referendumit, gjegjësisht të miratohen nga populli.

Për të parandaluar këtë mundësi, që sipas shumicës në Zvicër shkon në ekstrem, janë bërë bashkë në një komitet kundërshtues mbipartiak të gjitha partitë parlamentare të Zvicrës përveç SVP-UDC-së.

Komiteti druan se iniciativa e AUNS mund të fitonte në referendum, sepse bartësit e saj proklamojnë se vetëm duan të forcojnë demokracinë e drejtpërdrejtë në Zvicër. Në një situatë të tillë, ata që do ta kundërshtonin do të hynin në taborin e “armiqve të të drejtave të popullit” dhe kjo do të ishte absurde. Për të evituar këtë gjendje edhe është themeluar komiteti, njofton sf1. 

Sipas themeluesve të tij, nuk do të kemi më tepër demokraci vetëm me faktin se do të votojmë për secilën çështje.