Arbeni takon therësin e tij në spital

Therësi i tij, Navid*, një i ri nga Afganistani, po punonte si infermier në spitalin ku Arbeni po kurohej

Arbenit* i është dashur të përballonte një tronditje të thellë kur, i shtruar në spital nga plagët e therjes me thikë, është ballafaquar me personin që ia ka shkaktuar këto plagë. Therësi i tij, Navid*, një i ri nga Afganistani, po punonte në atë spital si infermier! I frikësuar se ai sërish mund ta sulmojë, Arbeni ik nga spitali, ende pa iu shëruar pesë plagët që i kishte nga thika e infermierit.

Ngjarja kishte filluar mbrëmjen e të shtunës në diskotekën Hollywood Bar në Frauenfeld, shkruan 20 Minuten. Sipas versionit të Arbenit, në mes tij dhe afganistanezi Navid lind një zënkë që shkallëzon në rrahje fizike. Arbeni e rrah fort Navidin. Por, rrugës për tu kthyer në shtëpi, pakistanezi i kishte zënë atij pritën dhe e kishte goditur pesë herë me thikë, duke i shkaktuar plagë të rënda.

Por tronditja më e madhe për Arbenin vjen më vonë. Kur e sheh sulmuesin e tij në spitalin ku ai duhej të kurohej. “Si ka mundësi që një spital të punësojë një therës?”, pyet Arbeni. Ndërkaq drejtori i spitalit nuk ka dashur të komentonte më shumë. Ajo që dihet është se edhe Navidi është shtruar në spital, pas rrahjes. Po kështu, ai konsiderohet si djalë shembullor, i integruar mirë në Zvicër, ku kishte gjetur strehim pas ikjes nga talibanët.

Megjithatë, Arbeni nuk mundet të kuptojë: “Ai është një kriminel dhe duhet të burgoset”. Ndërkohë prokuroria është duke u marrë me rastin.

*(Emrat janë ndryshuar)