Arkaizëm: hakmerret për gjyshin pas 49 vjetësh

Shkak dyshohet hakmarrja, pasi babai i viktimës ka vrarë gjyshin e autorit, ngjarje e ndodhur 49 vite më parë, më 1968

Hakmarrjet në Shqipëri vazhdojnë të jenë prezente, madje me vrasje që kanë ndodhur dekada më parë.

Policia e Fierit ka arritur të zbardhë një vrasje të ndodhur rreth një vit më parë, duke vënë në pranga dhe autorin e dyshuar, raporton “TCH”.

Ngjarja kishte ndodhur nëntorin e kaluar, ku trupi i pajetë i Shefo Duraj, 57 vjeç, teknolog në uzinën e Ballshit u gjet nga një bari në pyllin e fshatit Kalenjë të Mallakastrës.

Policia ka bërë të mundur zbardhjen e ngjarjes duke ndaluar autorin e dyshuar Feti Yzeiraj, 41 vjeç nga fshati Aranitas i Mallakastrës. Shkak dyshohet hakmarrja, pasi babai i viktimës ka vrarë gjyshin e autorit, ngjarje e ndodhur 49 vite më parë, më 1968, përcjell albinfo.ch.

Ai akuzohet për vrasje penale me dashje, ndërkohë që policia po kërkon ende më shumë prova rreth këtij rasti.