Zviceranët kanë paguar 3.8 për qind më shumë për shëndetësi

Përcaktues për rritjen e kostos ka qenë ngritja e çmimit të trajtimit ambulantor nëpër spitale. Në këtë segment ka pasur shtrenjtim prej 8.0%

Kostoja e sigurimit shëndetësor bazë (të detyruar) gjatë vitit 2016 është shtrenjtuar 3.8 për qind për person në krahasim me një vit më parë. Siç njofton bashkësia e sigurimeve shëndetësore Santesuisse në një komunikatë, kjo rritje e kostos është një trend që po vazhdon prej disa vitesh, shkruan srf.ch.

Përcaktues për rritjen e kostos ka qenë ngritja e çmimit të trajtimit ambulantor nëpër spitale. Në këtë segment ka pasur shtrenjtim prej 8.0 për qind, transmeton albinfo.ch. Ndërsa çmimet e paguara për shërbimet e mjekëve me ordinanca private janë rritur 3.5% për person të siguruar.

Santesuisse tërheq vërejtjen se ngritja e vazhdueshme e kostos është për brengosje pasi që në të njëjtën kohë pagat kanë pasur një ngritje fare të vogël.

Shifrat janë publikuar dje, e martë, dy ditë para publikimit të premive të sigurimeve shëndetësore për vitin 2018. Ngritja e çmimeve të premive është në varësi nga lëvizja e çmimeve të shërbimeve shëndetësore në përgjithësi.