Hyrja në BE do të “trashte” zviceranët!

Një studim ka konstatuar se “në rast të hyrjes së Zvicrës në BE, popullsia do të shtonte në peshë"

Zviceranët frikësohen se në rast të hyrjes së Zvicrës në Bashkimin Evropian, ata do të trasheshin! Dhe, duket se kanë të drejtë. Këtë e ka konstatuar në mënyrë shkencore një studim i bërë nga Universiteti i Lozanës.

Ja se për se është fjala: duke krahasuar mesataren e kalorive që konsumojnë qytetarët e vendeve të BE-së me ato që konsumojnë zviceranët, del se këta të fundit hanë më pak.

“Pas hyrjes në BE, në Gjermani, Itali, Francë dhe Portugali ishin ulur çmimet e prodhimeve të mishit dhe të qumështit”, sqaron udhëheqësi i studimit, Vidal. Për pasojë, ishte rritur konsumi i tyre dhe kështu banorët e këtyre shteteve kishin shtuar peshë. Para hyrjes në BE, portugezët, fjala vjen, konsumonin më shumë peshk dhe vaj ulliri ndërsa e evitonin mishin. “Sot, konsumimi i mishit, në veçanti mishit të kuq ka shënuar rritje të madhe”.

Nga ana tjetër, në Zvicër, çmimet e mishit kane mbetur të larta dhe për këtë arsye zviceranët përcaktohen më me dëshirë për mishin e shpezëve që është më i lirë.

Sipas studiuesit Vidal, ka edhe një arsye tjetër për dallimin që kane në peshë zviceranët me shtetasit e vendeve të BE-së. Ushqimet e vendeve të përmendura përmbajnë më tepër sheqer dhe yndyrë, shkruan 20Minuten.ch.

Këtë gjendje e pranojnë edhe kompetentët evropianë. Një masë që mendohet të përmirësojë gjendjen është deklarimi më i saktë i përbërjes së sheqerit dhe të yndyrës në paketimet e ushqimeve.

Përderisa shtetasit e vendeve jugore të BE-së heqin dorë gjithnjë më shumë nga mënyra e ushqimit mediteran, zviceranët pëlqejnë më shumë këtë mënyrë ushqimi. Ata konsumojnë më tepër perime, peshk, vaj ulliri dhe më pak mish të kuq”, thotë David Fäh, mjek i preventivës në Universitetin e Cyrihut. Ndërkaq, Vidal shpreson që kështu të mbetet edhe më tutje. Sipas tij “në rast të hyrjes së Zvicrës në BE, popullsia me gjasë do të shtonte në peshë”.