Edhe Lucerni “fal” ata që kapen me më pak se 10 gramë kanabis

Në këtë mënyrë Lucerni vepron duke zbatuar vendimin që Gjykata Federale e Zvicrës ka marrë ditë më parë

Pas Cyrihut, edhe Lucerni bëhet tolerant në raport me konsumuesit e kanabisit në sasi të vogla. Kështu, policia e këtij kantoni ka vendosur që të mos i ndjekë personat të cilëve u gjendet drogë e këtij lloji që nuk e kalon sasinë prej 10 gramëve, transmeton albinfo.ch mediat zvicerane.

Në këtë mënyrë Lucerni vepron duke zbatuar vendimin që Gjykata Federale e Zvicrës ka marrë ditë më parë. Vendimi në fjalë e kishte shpallur të pafajshëm një person nga Kantoni Baselstadt i cili ishte dënuar për posedimin e një sasie shumë të vogël të kanabisit.

Kështu, policia e Lucernit ka marrë udhëzim prej Prokurorisë së Kantonit që të mos shqiptojë më gjoba kundërvajtjeje për personat që kapen me më pak se 10 gramë kanabis. Këtë e ka konfirmuar për gazetën “Luzerner Zeitung” një zëdhënës i policisë.

Por do të vazhdojnë të dënohen ata të cilët kapen duke konsumuar kanabis. Ndërsa të rinjtë deri në mosën 18 vjeçare do të ndëshkohen edhe për posedim të çfarëdo sasie kanabisi.