Presidentja Schlumpf: Na pret një vit i vështirë

Presidentja e Zvicrës Eveline Widmer-Schlumpf, në fjalimin e saj të Vitit të Ri ka kërkuar nga zviceranët më shumë bashkëpunim dhe frymë afrie për t`i zgjidhur problemet bashkërisht. Sepse, siç ka thënë ajo, Zvicrën e pret një vit i vështirë.

“Viti i ri 2012 nuk do të jetë i lehtë, as për ne, as për Evropën dhe as për botën”, ka thënë Widmer-Schlumpf. Ka shumë çështje të hapura, ndërkohë që përgjigjet e thjeshta, praktikisht nuk ekzistojnë.

Presidentja njëkohësisht i ka siguruar shtetasit e saj se Qeveria Federale do të bëjë gjithçka për të mbështetur ndërmarrjet dhe të punësuarit zviceranë.

Zvicra, sipas saj ka përjetuar edhe herë tjera kohë të vështira, por gjithmonë ia ka dalë që të gjejë zgjidhje të mira për problemet.