Rritet numri i bujtjeve në hotelet zvicerane

Gjatë 6 muajve të parë të vitit, në hotelet e Zvicrës janë prenotuar 17.6 milionë bujtje, që është për 4.4 për qind më shumë se në periudhën e njëjtë të një viti më parë

Hoteleria zvicerane gjatë gjysmëvjetorit të parë të këtij viti ka regjistruar një rritje të ndeshmë të bujtjeve. Siç bën të ditur Zyra Federale për Statistikë, gjatë kësaj periudhe në hotelet e Zvicrës janë prenotuar 17.6 milionë bujtje, që është për 4.4 për qind më shumë se në periudhën e njëjtë të një viti më parë.

Numri i bujtjeve të realizuara nga turistët e huaj është rritur për 4.7 për qind duke arritur në 9.5 milionë gjithsej, transmeton albinfo.ch. Sipas njoftimit, numrin më të madh të turistëve të huaj që frekuentojnë hotelet zvicerane e përbëjnë ata nga Azia dhe nga Amerika.

Nga ana tjetër, turistët vendorë kanë realizuar gjatë këtyre gjashtë muajve 8.1 milionë bujtje, duke shënuar po ashtu një ngritje, prej 4.0 për qind. Shikuar sipas muajve veç e veç, ngritja më e madhe është realizuar gjatë muajit qershor.