40 vjet e nget veturën pa leje

Gjatë gjithë kësaj kohe ai nuk ka pasur asnjë aksident ose shkelje të rregullave në trafik

Në mëngjesin e sotëm, në Affoltern am Albis të kantonit e Cyrihut është kapur pa patentë shoferi dhe është tërhequr nga trafiku. Deri këtu, nuk ka ndonjë gjë jo të zakonshme.

Por e veçanta është se shoferi, një zviceran 58 vjeçar kishte vozitur plot 40 vjet pa pasur kurrë patentë shoferi. Dhe, gjatë gjithë kësaj kohe ai nuk ka pasur asnjë aksident ose shkelje të rregullave në trafik.

Shoferi në fjalë është kapur pasi ka rënë në sy të policisë po e ngiste veturën e tij me një shpejtësi tepër të ulët. Pasi u mor në pyetje u konstatua se ai nga mosha 18 vjeçare ka ngarë gjatë gjithë kohës veturën pa pasur fare të dhënë provimin për ngasje.

Dënimi i parë i shqiptuar është ky i sotmi: atij i është marrë vetura nga policia dhe është detyruar të udhëtojë për në shtëpi me tren.