Zvicrës “i zhduken” komunat

Deri në fund të vitit, 79 komuna të Zvicrës do të fuzionohen gjegjësisht do të shkrihen në 23 bashkësi më të mëdha

Edhe këtë vit ka vazhduar në Zvicër tendenca e “zhdukjes” së komunave. Kjo vjen si rezultat i fuzionimit të një numri të madh të komunave të vogla në një numër të vogël të komunave më të mëdha.

Deri në fund të vitit, 79 komuna të Zvicrës do të fuzionohen gjegjësisht do të shkrihen në 23 bashkësi më të mëdha, bën të ditur Enti Federal i Statistikave. Si rezultat, Zvicra do të ketë vetëm 2495 komuna, nga rreth 2550 që ka pasur një vit më parë.

Tendenca e pakësimit të numrit të komunave në Zvicër nuk është vetëm e kohëve të reja. Kështu në vitin 1860 ky shtet ka pasur 3146 komuna, numri i të cilave me kohë ka filluar të zvogëlohet.

Viteve të fundit është shpejtuar edhe më shumë trendi në fjalë.

Në fillim të vitit që vjen, 2012, në kantonin Vaud do të bashkohen 17 komuna për të bërë 4 sosh. Ndërsa 14 komuna në kantonet Bernë, Friburg, Soloturn, Graubünden dhe Aargau do të shkrihen në 7.

Në kantonin e Tiçinos, ne muajin prill, 19 komuna do të shkrihen në 5 sosh.