Shqiptari shpëton fqinjët nga zjarri

Falë veprimit të guximshëm të Safet Hisenit, "heroit nga Sirnachu", askush nuk ka pësuar nga zjarri

Ishte ora 3, vonë pas mesit të natës, të shtunën e javës së kaluar. Punëtori mekanik, 42 vjeçari Safet Hiseni, po flinte në gjumë të thellë, deri sa e shoqja, Xhezidja, e zgjon, në panik. “E kam dëgjuar një krismë të mbytur dhe pastaj diçka si vetëtimë e ka ndriçuar gjithë banesën”, ka treguar Xhezidja për blick.ch. zjarri qe vënë para derës së banesës së familjes nga Kosova.

“Dhoma e djalit tim 9 vjeç është menjëherë pranë derës së hyrjes. Së pari e kam marrë djalin dhe e kam bashkuar gjithë familjen në dhomën e ditës”, tregon Hiseni.

Fillimisht mendova se e gjithë ndërtesa ishte në flakë. menjëherë më shkoi mendja te të gjithë fëmijët që banojnë në ndërtesë. Duhej t`i lajmëroja të gjithë, citon Blick Safet Hisenin, të cilin e quan “heroi nga Sirnachu”.

Ai menjëherë ka alarmuar policinë dhe zjarrfikësit, pastaj ka kërcyer nga ballkoni në përdhese, ka vrapuar te hyrja e nërtesës dhe u ka rënë zileve të të gjithë banorëve. “I kam shtypur të gjitha zilet sepse porta e ndërtesës ishte e mbyllur”.

Falë veprimit të guximshëm të Hisenit, askush nuk ka pësuar nga zjarri.

Ndërkohë është kuptuar se policia ka gjetur shenja të zjarrvënies së qëllimshme të dikujt para banesës së kosovarit. A mund të jetë fjala për sulm kundër familjes?

Për Safet Hisenin kjo është një goditje e papritur. “Unë e merrja me mend se zjarri do të ketë shpërthyer nga ndonjë cigare e ndezur. Por, që dikush të ketë vënë zjarr në mënyrë të qëllimshme, kjo është keq! Kush do t`i bëjë diçka të tillë familjes sime? Unë nuk kam armiq, nuk i kam borxh askujt. Mos ka qenë dikush që urren të huajt?”

Ende është e paqartë nëse zjarri ishte drejtuar kundër familjes Hiseni. Fqinjët supozojnë se mund të jetë fjala për një akt hakmarrjeje të një ish banuesi 30 vjeçar kundër ish mikeshës së tij që banon në këtë ndërtesë.