Pas tërheqjes së Zuppiger-it, në lojë Walter

Kandidati i ri për qeveri, Hansjörg Walter, është zgjedhur vetëm dy ditë më parë kryetar i Këshillit Nacional të Parlamentit të Zvicrës.

Pasi që Bruno Zuppiger dha dorëheqje nga kandidatura e tij për postin në Këshillin federal, SVP-UDC i ka gjetur shpejtë zëvendësimin. Ai është Hansjörg Walter, i zgjedhur vetëm dy ditë më parë kryetar i Këshillit Nacional të Parlamentit të Zvicrës.

Hansjörg Walter vjen nga kantoni i Thurgaut dhe ka qenë tashmë, para tri vitesh, kandidat për anëtar qeverie. Është interesante se në kandidimin e parë atij i kishte munguar vetëm një votë, ajo e vetja (!) për t`u zgjedhur. Kishte fituar ministri i sotëm i mbrojtjes, Ueli Maurer.

Më 14 dhjetor, Walter dhe deputeti nacional nga kantoni i Freiburgut, Jean-François Rime do të jenë dy kandidatët e SVP-UDC-së për vendin në qeveri, të pretenduar nga kjo parti.