Buxheti për vitin 2012: 64.1 miliardë franga

Marrë në tërësi, buxheti i vitit 2012 parasheh rritje, në krahasim me atë të vitit 2011, për 1 miliard franga

Sot, në seancën plenare të Këshillit Nacional të Parlamentit të Zvicrës është miratuar buxheti i Zvicrës për vitin 2012. Sipas përcaktimit të Qeverisë dhe Këshillit të Kantoneve, ky buxhet do të jetë i rendë 64.1 miliardë franga.

Ndërkohë, komisioni për financa i Këshillit Nacional parasheh të ardhura pak më të vogla. Kjo sidomos për faktin se, sipas tij, nuk duhet të llogaritet që Banka nacionale në vitin e ardhshëm do t`ua shpërndajë fitimin e saj federatës dhe kantoneve.

Komisioni kërkon shkurtime në personel dhe në shpenzimet nga fusha e këshillimeve. Hapësirë tjetër për kursime¨, sipas propozimeve në kuvend, ekziston edhe në ndihmën për zhvillim (jashtë vendit) dhe në fushën e azilit.

Ndërkohë është kërkuar rritje e buxhetit për kulturë dhe për masa preventive. Marrë në tërësi, buxheti i vitit 2012 parasheh rritje, në krahasim me atë të vitit 2011 për  1 miliard franga.

Shumica e kësaj shume, gjegjësisht 600 milionë franga parashihet të ndahet për mirëqenie sociale. Rritje markante do të kenë edhe fushat si bashkëpunimi për zhvillim, arsimi, hulumtimi shkencor dhe komunikacioni.