Zuppiger, i akuzuar për përvetësim parash

Sipas "Die Weltwoche", Zuppiger ka provuar të përvetësojë 265 mijë franga nga pasuria e lënë trashëgim për organizata humanitare

Kandidati për Këshillin Federal të Zvicrës nga SVP-UDC, Bruno  Zuppiger mund të ketë problem serioz më 14 dhjetor, kur do të zhvillohet gara për këtë post. Javorja “Die Weltwoche” ka drejtuar akuza të rënda politikanit që konsiderohet se i takon krahut të matur brenda partisë me qëndrime radikale.

Sipas gazetës në fjalë, Zuppiger ka provuar të përvetësonte 265 mijë franga nga pasuria e lënë trashëgim për organizatat humanitare.

Në cilësinë e përmbaruesit të testamentit të një të punësuari në firmën e tij, para disa vitesh, Zuppiger ia ka “ndërruar drejtimin” vullnetit të të ndjerit. Ai, vetëm para një viti ua ka dorëzuar organizatave humanitare të hollat e lëna në testamentin e të ndjerit.

Madje edhe këtë veprim, thotë “Weltwoche”, ai e ka bërë vetëm pasi është përballur me kërcënimin me padi, të organizatave në fjalë.

Zuppiger në një prononcim për DRS ka thënë se bëhet fjalë për një gabim që ka ndodhur në firmën e tij. Por, ky gabim është përmirësuar pa e dëmtuar palën e tretë, ka thënë ai. Kryetari i SVP-UDC-së, Toni Brunner ka thënë se kryesia e partisë ka ditur për rastin që para nominimit të Zuppiger-it për postin e ministrit.