Voton ligjet me këmbë !

I sapozgjedhuri deputet federal i CVP-PDC-së, Christian Lohr, është pa krahë dhe me këmbë të atrofuara

Kurajoja dhe vullneti i tij duhet ta fascinojë çdokend. Christian Lohr, deputet federal zviceran i sapozgjedhur, nuk e ka lënë askend indiferent, sikurse nën kupolën e Kuvendit federal , ashtu edhe jashtë tij.

I lindur në vitin 1962 me të meta të rënda fizike, pa krahë, si pasojë e marrjes së një medikamenti nga nëna e tij gjatë shtatzanisë, Christian Lohr bëri betimin për deputet me këmbë dhe shtyp po ashtu me këmbë pullën e votimit të ligjeve zvicerane që aprovohen në Parlamentin e Konfederatës helvetike.

E përditshmja «Le Matin» ia kushton faqen e parë si dhe kolumnën ditore këtij deputeti të pagjymtyrë. Në këtë të përditshme theksohet se deputeti në fjalë kryen të gjitha lëvizjet me të vetmen gjymtyrë që i funksionon, pra me këmbën e djathtë.

Kështu që ai ha me këmbë, vozit fotelen e tij lëvizëse, telefonon dhe iu shtrëngon duart kolegëve të tij.

Christian Lohr është anëtar i zyrës së «Pro Infirmis» që me vite dhe prezenca e tij në parlament përbën një dimension të çmuar simbolik. Sipas tij, krahasuar me vendet fqinje Zvicra është ende mbrapa sa i përket lehtësimit të lëvizjes së të hendikepuarve në hapësirat publike.