Këshilli Federal paraqiti qëllimet e tij për 2012-ën

Të hënën, në Dhomën e Këshillit nacional, Këshilli Federal ka vendosur objektivat e tij për vitin 2012. Micheline Calmy-Rey, Presidente e Konfederatës, prezantoi pikat kryesore të programit të qeverisë për vitin e parë të legjislaturës së re 2011-2015.

Në fillim të çdo seance dimërore të Parlamentit, Këshilli Federal komunikon objektivat e tij për vitin e ardhshëm. Këto qëllime janë të lidhura me programin e legjislaturës. Legjislatura 2011-2015 do të përqendrohet në gjashtë udhëzime, me temat në vijim: atraktiviteti dhe konkurrenca e ekonomisë zvicerane, pozita e Zvicrës në nivel rajonal dhe global, përmbajtja e sigurisë së vendit, konsolidimi i kohezionit kombëtar, përdorimi i qëndrueshëm i energjisë dhe i burimeve natyrore dhe, në fund, ruajtja e pozitës udhëheqëse të Zvicrës në fushat e kërkimit, trajnimit dhe inovacionit.

Këshilli Federal do të miratojë plan-programin e legjislaturës 2011-2015 në fillim të vitit 2012 dhe do të paraqesë strategjinë dhe udhëzimet e programit të tij. Më pas, parlamenti do të ketë mundësinë të komentojë dhe të shprehë pikëpamjet e tij gjatë dekretit përkatës federal.

Me paraqitjen e objektivave për vitin 2012, Këshilli Federal paraqet programin e tij për vitin e parë të legjislaturës së re. Pikat kryesore të këtij programi janë:

• Përmirësimi i kushteve të përgjithshme që rregullojnë ekonominë zvicerane

• Sqarimi i marrëdhënieve institucionale mes Zvicrës dhe BE-së

• Konsolidimi i sigurisë

• Rishikimi i politikës së migracionit, sigurimeve shoqërore dhe shëndetësore publike

• Konkretizimi i strategjisë energjetike 2050 dhe financimi i infrastrukturës hekurudhore

• Financimi për kërkim, trajnim dhe inovacion.