Liberalët e Soloturnit, pas 163 vitesh pa përfaqësim në Këshillin e Kantoneve

Vendin e humbur nga Kurt Fluri i FDP-PLR-së, e ka fituar përfaqësuesi i CVP-PDC-së, Pirmin Bischof

Në balotazhin e zgjedhjeve për Këshillin e Kantoneve, që sot u mbajt në Kantonin e Solothurnit, Partia Liberale e Zvicrës (FDP-PLR) e këtij kantoni ka humbur për herë të parë pas 163 vitesh vendin e saj në këshillin e përmendur. Vend të cilin ajo e ka mbajtur që nga fillimi i funksionimit të Zvicrës si demokraci parlamentare.

Vendin në këshillin e kantoneve ose dhomën e vogël të Parlamentit Nacional të humbur nga Kurt Fluri, e ka fituar përfaqësuesi i CVP-PDC-së, Pirmin Bischof, i cili ka grumbulluar rreth 8000 vota më tepër se kundërkandidati.

Me fitimin e një vendi nga CVP-PDC, ndryshon edhe përbërja e përgjithshme e Asamblesë, ose e parlamentit, që përbëhet nga dy dhoma (këshilla). CVP tashmë do të ketë 41 deputetë, aq sa i kanë mbetur edhe FDP-së.