Humb jetën gazetarja zvicerane nga sulmi me mina në Mosul

Véronique Robert ndodhej në përcjellje të forcave speciale irakiane të cilat po luftojnë për të dëbuar nga Mosuli terroristët e ISIS-it.

Nga një sulm me mina në Mossul të Irakut ka humbur jetë gazetarja zvicerane-franceze, Véronique Robert. Ajo ndodhej në zonën e krizës si reportere lufte.

Nga plagët e marra ajo ka vdekur në spital, njofton France Télévision. Ky televizion e kishte angazhuar gazetaren për të realizuar një reportazh për emisionin “Envoye Special”.

Veç saj, në këtë sulm me mina kanë humbur jetën edhe gazetari televiziv francez Stephen Villeneuve dhe reporteri kurd, Bachtijar Addad.

Véronique Robert ishte operuar në Bagdad në natën në mes të të enjtes dhe të premtes, bën të ditur France Télévision në një njoftim të publikuar sot, transmeton albinfo.ch. Pastaj ajo ishte transportuar në Paris, ku kishte vdekur në spital.

Robert ndodhej në përcjellje të forcave speciale irakiane të cilat po luftojnë për të dëbuar nga Mosuli terroristët e ISIS-it. Këto trupa, të dielën që shkoi kishin filluar të depërtojnë në rrugët e qytetit ndërsa ofensiva aktuale konsiderohet si pjesë e fazës vendimtare për futjen nën kontroll të qytetit të dytë më të madh të Irakut.

Reporterja 54 vjeçare e luftës, më parë ka punuar edhe në magazinën “Paris Match”.