Nesër në Zvicër votohet për ligjin e ri mbi energjinë

Në rrafshin nacional zviceranët ne të drejtë vote, të dielën do të vendosin lidhur me ligjin e ri mbi energjinë (EnG)

Keystone

Nesër, më 21 maj në gjithë Zvicrën është ditë referendumesh në nivel nacional dhe në nivele kantonesh dhe komunash.

Në rrafshin nacional zviceranët ne të drejtë vote, të dielën do të vendosin lidhur me ligjin e ri mbi energjinë (EnG), shkruan srf.ch. Me strategjinë energjetike 2050, Këshilli Federal dhe Parlamenti i Zvicrës synojnë që të ulin nivelin e shfrytëzimit të energjisë dhe të mundësojnë braktisjen e energjisë nukleare, pa rrezikuar me këtë rast sigurinë e furnizimit me energji.

Për të siguruar këtë, ligji i ri parasheh stimulimin më të madh të burimeve të energjisë së rinovueshme  si energjia diellore, ajo me erë dhe ujë, transmeton albinfo.ch. Synohet ulja e lëndëve djegëse fosile të importuara si thëngjilli, benzina dhe vajguri. Ndërkaq, referendumi do të mbahet për arsyen se SVP ka atakuar ligjin e ri për energjinë, të përmendur më lart. Ndryshe, të gjitha partitë tjera janë në favor të ligjit të ri.

Ndryshe, në 16 kantone nesër do të votohet për iniciativa të ndryshme. Kështu, në Kantonin Baselstadt, qytetarët do të votojnë për ndërtimin e një shtegu çiklistik , në Kantonin e Cyrihut, për mësimin e vetëm një gjuhe të huaj në shkollat fillore, në Kantonin e Tiçinos do të ketë votim për taksat e mbeturinave etj.

Në Kantonin Vaud ndërkaq, nesër do të mbahet raundi i dytë i zgjedhjeve për qeverinë e kantonit. Ato do të përcaktojnë nëse do të vazhdojë ta përbëjnë shumicën në qeveri, si deri tash, e majta e përbërë nga socialistët dhe të gjelbrit ose do të fitojë e djathta.