Leja për autoshkollë, nga mosha 17 vjeçare

Personat nën moshën 25 vjeçare do të lejoheshin t`i nënshtrohen provimit praktik të vozitjes vetëm nëse e kanë pasur së paku për 12 muaj lejen për mësim të vozitjes (autoshkollës)

Në të ardhmen, të rinjtë në Zvicër do të mund të marrin lejen për mësim të ngasjes së automobilit (për autoshkollë) në moshën 17 vjeçare, për ndryshim nga sot kur kjo është e mundur vetëm për 18 vjeçarët.

Zyra Federale për Rrugë, Astra, e ka lëshuar për konsultim një propozim lidhur me këtë, shkruan srf.ch. Astra po ashtu ka kërkuar që mësimi i vozitjes duhet të përmirësohet, të thjeshtësohet nga pikëpamja administrative dhe të kushtojë më lirë.

Sipas propozimit në fjalë, personat nën moshën 25 vjeçare do të lejoheshin t`i nënshtrohen provimit praktik të vozitjes vetëm nëse e kanë pasur së paku për 12 muaj lejen për mësim të vozitjes (autoshkollës), transmeton albinfo.ch. Gjatë kësaj kohe ata duhet të kenë bërë përvojë praktike në vozitje.

Do të vazhdojë edhe më tutje leja provuese trevjeçare e vozitjes por, duhet absolvuar edhe kursi i rikualifikimit. Ky i fundit duhet të ndiqet në gjashtë muajt e parë pas provimit.