Vlora Çitaku flet në Uashington për krizën e refugjatëve

Një ndër folëset kryesore, ka qenë ambasadorja e Kosovës në Uashington, Vlora Çitaku, e cila tha se pikërisht 18 vjet më parë, ajo vetë ishte një refugjate, e detyruar të zhvendosej si pjesë e fushatës së spastrimit etnik

Kriza e refugjatëve ka pushtuar botën, madje numri i tyre ka arritur në 65 milionë, apo numri më i madh që nga Lufta e Dytë Botërore. Ky ka qenë vlerësimi i organizatës “Refugees International”, raporton ‘Zëri i Amerikës’.

Një ndër folëset kryesore, ka qenë ambasadorja e Kosovës në Uashington, Vlora Çitaku, e cila tha se pikërisht 18 vjet më parë, ajo vetë ishte një refugjate, e detyruar të zhvendosej si pjesë e fushatës së spastrimit etnik:

“Nuk do të harroj kurrë se si thërriste nëna ime: ‘Vlora, kujdesu për motrat dhe kurrë mos e harro vendlindjen. Sot, miliona refugjatë nga vende të ndryshme të botës janë të detyruar të jetojnë me të njëjtat fjalë në mendje: ‘Kurrë mos harroni se nga keni ardhur’”, ka thënë ajo, përcjell albinfo.ch.

Zonja Çitaku tha se askush në botë nuk dëshiron të jetë refugjat dhe askush nuk zgjedh të jetë refugjat.

“Më kujtohet se si dola nga shtëpia me tre motrat e mija, duke mbajtur të voglën në krahë, pa e ditur se ku do të shkonim, pa adresë, të ndarë nga çdo gjë që njihnim dhe donim. Jetonim me frikë, por e mbanim veten me shpresën se një ditë do të ktheheshim në shtëpi.”

Ajo tha se kishte ardhur për të treguar jo se kishte qenë refugjate, por se kishte mundur të kthehej në shtëpi. Historia e Kosovës, tha zonja Çitaku, tregon se njerëzimi është i aftë të bëjë mrekullira.

“Por ndërsa politikanët kanë nevojë për kohë për t’u marrë me problemet e botës, ne të tjerët thjesht kemi nevojë të tregohemi humanë dhe bujarë”.

Ishte ftuar të interpretonte edhe kitaristi i njohur nga Kosova, Taulant Mehmeti, i cili ka qenë vetë refugjat: “Mendoj se është shumë e rëndësishme të ndihmohen miliona fëmijët dhe njerëzit nëpër botë, të cilët janë refugjatë, pasi meritojnë të gjitha të drejtat si njerëzit e tjerë. Unë vetë kam qenë refugjat, prandaj e di rëndësinë më shumë se të tjerët.